Hornafjörður stendur á sterkum grunni. Það er auðvelt að segja þetta svona í kosningagrein. Sterkur grunnur. Fjölbreytt atvinnulíf. Verðmætasköpun. Uppbygging. Allt mjög rétt og allt mjög mikilvægt. En á bak við þessi orð er fólk.
Það er fólkið sem fer fyrst á fætur á morgnana. Fólkið sem opnar búðina, fer út á sjó, sinnir skepnunum, bakar brauðið, keyrir vélarnar, svarar símanum, tekur á móti gestum, sinnir börnum, eldri borgurum, íbúum og ferðamönnum. Það er fólkið sem borgar laun, reddar vöktum, tekur áhættu, sefur stundum illa yfir rekstrinum og mætir samt aftur daginn eftir. Þetta fólk heldur samfélaginu okkar gangandi.
Sterkt atvinnulíf skiptir okkur öllu máli, ekki bara fyrirtækin sjálf. Ekki bara fyrir þau sem eiga rekstur. Heldur fyrir okkur öll. Því sterkt atvinnulíf þýðir fleiri störf, sterkari innviði, betri þjónustu, öflugri skóla, meira líf í bænum, fleiri tækifæri fyrir ungt fólk og meiri von um að fólk geti séð framtíð fyrir sér hér, í Hornafirði.
Við megum aldrei taka þessu sem sjálfsögðum hlut. Sterkt atvinnulíf verður ekki til af tilviljun.
Það gerist ekki bara af því að við erum heppin að búa á fallegum stað. Það gerist vegna þess að fólk þorir að framkvæma. Fólk hefur hugmyndir. Fólk leggur á sig vinnu. Fólk gefst ekki upp þótt það sé stundum erfitt. Og já — það er stundum erfitt.
Fyrirtækin okkar eru ólík. Lítið fjölskyldufyrirtæki er ekki í sömu stöðu og stórt fyrirtæki. Dýralæknir, bakari, strandveiðisjómaður, verktaki, bóndi, ferðaþjónustuaðili, iðnaðarmaður, verslunareigandi og tæknifyrirtæki glíma ekki öll við sömu áskoranir. En mörg þeirra finna samt fyrir sömu hlutunum.
Það vantar fólk. Það vantar húsnæði. Það vantar atvinnuhúsnæði. Það vantar lóðir. Rekstrarkostnaður er hár. Gjöld, lán, flutningar, aðföng og laun stoppa ekki af því að það er rólegur mánuður. Árstíðasveiflur skipta máli. Vextir skipta máli. Gengi skiptir máli. Eldsneytisverð skiptir máli.
Staðan er sterk, en áskoranirnar raunverulegar og stundum er tilfinningin einfaldlega þessi:
Fólk er tilbúið að byggja upp — en kerfið er ekki alveg tilbúið að vinna með því.
Það má ekki vera þannig að fólk sem vill skapa störf, byggja upp rekstur og leggja sitt af mörkum þurfi stöðugt að berjast við óvissu, skort á aðstöðu og ferla sem hreyfast of hægt. Við eigum að gera fólki auðveldara að framkvæma.
Þess vegna ætlum við að móta skýra atvinnustefnu fyrir Hornafjörð í nánu samtali við atvinnulífið og íbúa. Ekki atvinnustefnu sem er skrifuð ofan í skúffu og gleymist þar. Heldur raunverulega framtíðarsýn sem svarar spurningunni:
Hvernig viljum við að Hornafjörður þróist sem atvinnusvæði næstu árin?
Það skiptir sérstaklega miklu máli núna. Framundan eru stórar ákvarðanir um uppbyggingu, skipulag og framtíð miðbæjarins á Höfn. Þá verðum við öll að taka þátt og móta hvert við erum að fara. Við þurfum að skilja þarfir fyrirtækjanna, fólksins sem vinnur í þeim og þeirra sem vilja stofna til nýrrar starfsemi.
Við ætlum að horfa til allra atvinnugreina. Stórra jafnt sem smárra. Þeirra sem hafa verið hér lengi og þeirra sem eru rétt að byrja. Þeirra sem skapa mörg störf og þeirra sem skapa eitt eða tvö störf — því stundum byrjar stærsta uppbyggingin einmitt þar.
Við leggjum því áherslu á að efla heilsársatvinnu, fjölga fjölbreyttum störfum og styrkja möguleika fólks til að starfa héðan, líka í fjarvinnu í dreifbýlinu. Það á ekki að vera nauðsynlegt að flytja burt til að fá spennandi starf. Við eigum að geta skapað fleiri tækifæri hér heima með raunhæfum aðgerðum:
- Við viljum tryggja betra aðgengi að atvinnulóðum og húsnæði fyrir atvinnustarfsemi. Það er lítið gagn í því að hvetja fólk til uppbyggingar ef það fær hvergi pláss til að byggja upp.
- Endurskoðum gjaldskrár sveitarfélagsins. Byggingargjöld, fasteignagjöld, sorpgjöld og önnur gjöld þurfa að vera sanngjörn, skýr og fyrirsjáanleg. Sveitarfélagið á ekki að vera dragbítur á uppbyggingu. Það á að vera traustur samstarfsaðili.
- Eflum atvinnu- og rannsóknarsjóðinn. Góðar hugmyndir þurfa jarðveg. Nýsköpun þarf stuðning. Þróun þarf svigrúm. Það er ekki nóg að tala fallega um frumkvæði — við þurfum að búa til aðstæður þar sem frumkvæði fær að vaxa.
Hornafjörður er einstakur staður og við þurfum að kynna það!
Það vita þau sem búa hér. En við þurfum að vera markvissari í því að kynna sveitarfélagið sem stað til að búa á, starfa á, fjárfesta í og heimsækja allt árið um kring. Góð ímynd verður ekki til af sjálfu sér. Hún þarf að byggjast á raunverulegum styrkleikum, skýrri sýn og stolti yfir því sem við höfum fram að færa.
Við ætlum að fjárfesta markvisst í markaðssetningu sveitarfélagsins með það að markmiði að:
- Auka sýnileika fyrirtækja á svæðinu.
- Fjölga íbúum og skapa fleiri atvinnutækifæri.
- Laða að fleiri gesti allt árið um kring, sérstaklega á vetrarmánuðum.
- Styrkja ímynd Hornafjarðar sem eftirsóknarverðs staðar til búsetu, atvinnu og fjárfestinga.
Ég trúi því að Hornafjörður eigi fullt inni.
Ég trúi því að hér sé fólk með hugmyndir sem á eftir að framkvæma meira. Ég trúi því að hér séu fyrirtæki sem geta vaxið. Ég trúi því að hér geti ungt fólk séð framtíð fyrir sér. Ég trúi því að nýir íbúar geti fundið hér heimili. Ég trúi því að við getum byggt upp samfélag þar sem það er eftirsóknarvert að búa, starfa og skapa. En þá þurfum við að velja uppbyggingu!
Við þurfum að velja skýra stefnu. Við þurfum að velja samtal við atvinnulífið og íbúa. Við þurfum að velja lausnir í stað flækjustigs. Við þurfum að velja kjark til að horfa fram á við.
Atvinnumál eru nefnilega ekki bara málaflokkur fyrirtækja, atvinnumál eru líf fólks. Fjölskyldur. Launaseðlar. Fyrirtæki. Hugmyndir. Áhætta. Svefnlausar nætur. Stoltar stundir. Kaffibollar í pásu. Fyrsti starfsmaðurinn. Fyrsta launagreiðslan. Fyrsta sumarið sem gekk upp. Fyrsti veturinn sem var erfiður en hafðist samt.
Þetta er samfélagið okkar og fólkið sem skapar verðmætin á skilið sveitarfélag sem stendur með því.
Árangur áfram í atvinnumálum – Veljum X við D fyrir Hornafjörð!
Ágústa Margrét Arnardóttir
4.sæti XD – Hornafirði